بالله يا كبتن ترفق بالإقلاع=ترى مع الركاب ست الحبايب
إقلع على مهلك مبالزين يرتاع=لا يشعر إنه صار فوق السحايب
ياكبتن إرفق بالغلا زين الأطباع=اللي سفره يعدل كل المصايب
خصص معه أربع مضيفات تباع=يمشن لأمره بالرضا والغصايب
وليا طلبكم يتصل قول سماع=وصله بالأقمار والبال طايب
خله يكلمني ترى القلب ملتاع=ما كنت أظن بيوم بلقاه غايب
اللي مثل خلي ياكبتن بينطاع=محد(ن)يقل له ليش لو كان هايب
هذا حسين الدل في وجهه إشعاع=مثل شعاع البدر فيه العجايب
أبو عيون نجل حلوات و وساع=تسحر قوي العزم لو كان تايب
تكفا ياكبتن لا تزود للأوجاع=هون على قلب من الشوق ذايب
ما حس قلبي ساكن بين الأضلاع=قلبي معك واللي بجوفي شبايب
الأمر محسوم(ن)ولا تكثر نزاع=حاسب على قلبي تنوشه هبايب
بالله يا كبتن ترفق بالإقلاع=ترى مع الركاب ست الحبايب