الليلة الطاروق قام يتمرد=ما جاء على كيفي ولاني بكيفه
مثل البحر بين الجزر والتمدد=خلف الضلوع المرهفات النحيفه
مدري علامه بعد لينه تشدد=ما كني اللي في زماني حليفه
عقب الصداقة بيننا والتودد=على فؤادي سل مغمود سيفه
غزه بقلبي يا هلي ما تردد=بالنابض اللي في حشايه رفيفه
ناح القصيد وطاير الشوق غرد=على غصون القلب يبغا وليفه
غرامي اللي بالمحاسن تفرد=ما غاب عن عقلي ولا غاب طيفه
هواه بعروق الفؤاد يتجدد=يكبر غلاه بروح ولهى عفيفه
مير البلا بالحظ طبعه ينكد=أبعده عني حيف للحظ حيفه
حظي معه للوصل قام يتمرد=ما جاء على كيفي ولاني بكيفه