لو تامري عالقلب يرخص ويفداك=ولو تامري عالنفس جاتك عطيه
انتي التي فالعين بيتك وسكناك=وانتي مناة الروح يا اغلى بنيه
يا زين هقواتك ويا طيب ممشاك=الله خلقك وميزك عالبرية
لا عاش من يكرهك او من تعداك=ويبلاه ربي بالمرض والاذيه
انت وطن طارق اذا الوقت جافاك=وانتي له الموطن وانتي الهوية
انت الامل والنور مصدر محياك=وانسام عطرك تمتزج بالتحية
انت السماحة كلها رهن كفاك=واجزل عطا في شيمتك مالعطية
اهواك لا تساليني كيف انا اهواك=رغم ان نفسي في هواهم ابيه
اعشقك حد الموت واعشق خطاياك=اكثر من هوى قيس للعامريه
سبحانه الخالق عجب كيف سواك=انتي ملاكن جابه الله هديه
الطيب ينفح منك والعود شرواك=لك طلةن بد الخلائق بهية
والحسن يا خل ادنى مزاياك=والشمس من شوفتك تاقف حييه
تتفتح الازهار من لمس يمناك=ولولاك ما في القلب من عاطفيه
اهوى دلال ن بالحلا زاد حلاك=واعشق رزانة فيك جزله عصيه
يا زينها لحظة تلاقيت واياك=عشنا الهنا والحب فيها سويه
اجمل سنين العمر في وقت لقياك=واخسها فرقى الخوي عن خويه
سويت معروفن به الله جازاك=وجازاني الله فيك اعظم جزيه
وسويت ذنبن في حياتك تلافاك=ومثلك انا يمكن وقعت بخطيه
فجازاني الله في فراقك وابلاك=وطالنا في البعد لحظة شقيه
فالحمد لله عد ما الحسن غشاك=وعداد مانور القمر طل ضيه
وانت احمد الله يوم ربي لي اهداك=واغرس بقلبينا محبة قوية
واخر كلامي لو تبي العمر يفداك=ولو تامري عالروح جاتك عطيه
انتي التي بالعين بيتك وسكناك=وانتي مناة الروح يا اغلى بنيه