الليلة الطائف المأنوس كنه عروس=
تزينت من فرحها لأجل خطَّابها=
لبست ثمين الجواهر مع ثمين اللبوس=
الكسوة اللي غني الناس ما جابها=
كله على شأنكم ياطيبن النفوس=
الصحبة اللي يطيب الطيب بأطيابها=
تشريفكم باللقا لو ينشرى بالفلوس=
نشريه لو البنوك ايفلس حسابها=
الوصل ياأصحابنا سواة در الديوس=
اللي يبل الحلوق ويمسح أتعابها=
والليلة الجو صافي مستوي للهجوس=
بالحلة اللي مشرع للكرم بابها=
يامرحبا مرحبا عداد خضر ويبوس=
واعداد كتب الحروف وعد كُتابها=
عند النشاما نرحب هيل من قدح روس=
على علوم الرجال وكيف حيا بها=
سمن وسمين ٍ وبن ٍ بالدلال محموس=
ينساق فوق الكريم اللي مضرى بها=
الضيف من واجبه كنز الشحم والغموس=
ندهن وجيه الرجال وندهن أشنابها=
أنتم وحنا عطينا للنشاما دروس=
وأبلغ دروس النشاما فعل شيابها=
الوقت ماغير الأنفس لو إنه عبوس=
نأقف بوجه السنين ونكسر أنيابها=
أربع عقود الوفا جوف القلوب مغروس=
نسقيه من ذكريات ٍ حلو مشرابها=
الرفقة الطيبة مثل الحيا للعسوس=
يشرح صدور العسوس اللي تمشى بها=
ياليلة الأنس كنك بالليالي عروس=
تزينت من فرحها لأجل خطَّابها=