قابلتني بالطريق وقلت عدي=عن هوى التلعات من عامين تايب
أرخت اللثمة دلع مدري تحدي=تكسر النظرات ما تخشى المعايب
قلت تكفي طالبك وراك صدي=لا تجيبي لي بنظراتك مصايب
قالت أجل تعترف ما أنته بقدي=قلت:وابصم بالعشر والبال طايب
قانعٍ(ن)واللي مضى قبلك يسدي=لا تبليني بعد ما صرت شايب
جنبي عني قبل ينباح سدي=روحي لحالك وخلينا حبايب
قالت:أنا معجبه ما هو بيدي=مقدر ابعد لا تسوي لي غلايب
ما يهم العمر لو هو قد جدي=دام قلبي فيك يا مخلوق ذايب
الخفوق اللي بصدري صار ضدي=ما يبي غيرك رضا وإلا غصايب
قلت:يا بنت الشقا وش ذا التمدي=بالغصايب يا عجايب ياعجايب!!!
بعدي عني ترى ما أنتي بودي=خافقي مشغول في مضنون غايب
بالغلا يسوى جميع البيض عندي=وبالحلا ما له بكل البيض نايب
كمله ربي بذوق وحسن خدي=تحفي لخده نسانيس الهبايب
الجواهر تعشق لمعصم وقدي=مثل عشقي للمفاتن والترايب
ساحرٍ(ن)للروح في قربٍ(ن)وبعدي=من قدم رجليه لا حد الذوايب
غير ولفي بالزمن ما عاد بدي=هُو حبيب الروح من غُرب وقرايب
طول عمري في هوى المضنون جندي=لين عمري يختفي تحت النصايب
مير عني يا فتاة السوق لدي=روحي بدربك وخلي للطلايب
ردي اللثمة على المكشوف ردي=لا يشوفونك مدورة النشايب
حيدي عني وخليني أعدي=عن هوى التلعات من عامين تايب