يالله إني طالبك يكريم ويالطيف=يا عليمٍ(ن)بالسراير ومحصي عدها
كيف روحي تعلمه مالها سواه كيف=أنت خالق ذاتها وأنت تعلم سدها
كيف روحي ساكنة بين جدة والقطيف=ليت كفي حين أمده يلامس يدها
الهنوف اللي هوتني على قصدٍ(ن)شريف=ليتني أقضي لباقي حياتي عندها
رابية بين البساتين مرباع ومصيف=يعربية جدنا بالمناسب جدها
في ربيع العمر ما زارها فصل الخريف=يا حلاها في مزوح العلوم وجدها
ولعتني بالمحبة وانا قلبي رهيف=ما سحرني بالعذارى هنوفٍ(ن)قدها
عسفتني في هواها بلا مَن تعسيف=صرت معها بالمحبة ولاني ضدها
الحلا والذوق فيها طبيعي مو كليف=مبهرة في حكيها صادقة في ودها
لونها يبهر لعين المفتح والكفيف=كن برق الصيف يلمع مساء في خدها
الرموش تشابه الجند في محفل صفيف=السهوم ليا رموها صعيبٍ(ن)صدها
خصرها خاتم سليمان مبرومٍ(ن)نحيف=بين قوسين تعاكس ردوف ونهدها
ياهني من هي نصيبه ويا حظ الوليف=لا طوى يمناه خلف الكتوف وشدها
ثم صار القلب يرجف من الضمة رجيف=تطرد الأنفاس والعطر فاح بقدها
لا تمايل عودها بالبراد يصير صيف=غصن موز بريحة الفل خالط وردها
مهرةٍ(ن)في ركضها ما تبي فارس ضعيف=الأصيلة ما تبي غير كفو يسدها
دونها يغدي كما الحصن والحيد المنيف=لو تضايق من هبوب الشمال يردها
سيفها لن حدها الوقت تلقى حد سيف=وإن ضحك وجه الزمان الورود يمدها
الحبيبة منزلتها مثل منزال ضيف=ما تهان ولا ينقص هواها بعدها
دام عرق العشق بالقلب واصل للنزيف=المحبة طاغية بالحشا لابدها
يالله إني طالبك يكريم ويالطيف=يا عليمٍ(ن)بالسراير ومحصي عدها