تقول لي موجود وإلا مسافر=ما عاد تفرق دام حبي ما صنته
موجود لكني بليا مشاعر=غلاك من عقب الجفيا دفنتـه
بعد الغياب المر ما عدت فاكر=عقلي عن التفكير بعدك سجنته
شطبت لإسمك من جميع الدفاتر=اسمك مع النسيان فيني قرنته
وش فائدة أذكر لا صرت ناكر=حبي وشوقي دامني ما ظمنته
لو اللعن جايز بكل المنابر=حبك عليها بعد صدك لعنته
حبٍ(ن)كذيا ما يسر الخواطر=أتعب خفوقي بعد ما أنته سكنته
الى متى بيكون للصبر قادر=عقب المودة بالتباعد طعنته
طعن الجفا بيفوق طعن الخناجر=حسبي عليك اللي يعزك أهنته
ما عاد لي مقعاد عنك مغادر=فكيت قلبي منك عقب رهنته
تلقى بعدنا خير مقبل وحاضر=واللي مضى يفداك من عقب خنته
الله يعوض فوق شعرٍ(ن)وشاعر=والله يشافي قلبي اللي فتنته
أخر مطاف أحلامنا بالمقابر=وأنت الذي بيدك قبلي كفنته
ما عاد ينفع لو بغينا نحاذر=فات الأوان اللي بنيته قطنته
إن قلت لك موجود وإلا مسافر=ما عاد تفرق دام حبي ما صنته