يابن هليل لايهمونك ضعيفين النفوس=اللي مراجلهم مغير الهرج في سد القفا
اسحب علاهم مثل ماقالوا ودوس النذل دوس=النذل يبقى نذل لو جيته بمضمون الوفا
لكن حد السيف واعلنها كما حرب البسوس=والاد ثابت فاللقا كل(ن) بسيفه مرهفا
حنا نعرفك بالنزاهه مانت رجال(ن) بلوس=ياواثق الخطوه ملك جاك الجواب اللي كفا

الله على هذا الجواب اللي كما عد الفلوس=من عند راع الصدق ماهو من ضعيف مترفا
ربعي وأنا ماني على ربعي شحيح ولا عبوس=حنا بشر منا قوي والبعض منا اضعفا
وإن جاتني من نازحين البد حديت الضروس=على النقا مهي دسايس بالظلام وبالخفا
السيف مرهف واللسان أحد من خنجر وموس=ألاد ثابت عزوتي زبن الدخيل ليا لفا
أهل الكرم ما يحلفون بربهم حلف غموس=أهل البيوت الضافية يدفون من يبغا دفا
نمشي على نهج النبي ما نتبع لدين المجوس=أجدادنا وأحفادنا أهل مروة وشرفا
رجالنا يسوى مية لا من قعد بين الجلوس=خليفة(ن)لأجدادنا وأحفدنا النا خلفا
الورع يكبر والجهل ينزاح والدنيا دروس=واللي علومه واطية ما مكسبه غير الجفا
ماني مفتش حبهم لو كان بالماعون سوس=خل العلوم مسترة ربعي عوارف وعرفا
وليا لقيت المبتلا غطه تحت شق الهروس=وأطلب من الله يرحمه وإنه يعجل بالشفا
النار ما تكوي يكود اللي على الجمرة يدوس=والراعي اللي في حلال الناس فيدته الحفا
ليا شفت براق الحيا أرسلت للديرة عسوس=وترد لي علم الحيا قدام نبته يسرفا
ما زاعني صوت الذيابة كيف ترعبني بسوس=ماني ضعيف ولا جبان بالكتايف يكتفا
اليا نوينا نشعل النيران في راس الطعوس=ما ننتظر فزعة قريب ولا بعيد ولا حلفا
انلفها ونديرها لف المرواح بالتروس=للموتر اللي تو ماطوره جديد(ن)ما طفا
وإن كان خلف الضلع يا رجال بالدنيا حلوس=ماني مدور واحد مدسوس في سد الشفا
دام الليالي مقبله واللبس من عز اللبوس=لا تشغلون البال يا عقال والخافي خفا
ماني بضايف واحد(ن)في مجلسه دايم يهوس=واللي يجيني يا هلا يا مرحبا يلقا صفا
العقل زينة للبشر والا الشحم فوق التيوس=واللي يجادل جاهل(ن)ريقه وعقله ينشفا
هذا جوابي صرفه عقلي وراسي فوق روس=رد لجواب(ن)جالنا مثل النقود مصرفا

المشاركة الأصلية كتبت بواسطة صقـر عتيبـة (المشاركة 87531) صح السانك يا راع الصدق و صح السانك يا بن هليل رد وافي وكافي منكم والجاهل يسمع الكلام هذه يعقل بعده بأذن الله تـــــــقــــ تـــــــحــــــيـــــااااااااااااتـــــــي ـــــبـــــــلــــــــــو صقر عتيبة

المشاركة الأصلية كتبت بواسطة راع الصدق (المشاركة 87535) صح لسان شيخنا ولسان قبيلتنا المظفر على هذا الرد الوافي الكافي الجزل تقبل تحياتي بكل احترام وتبجيل ولا هان اخوي الفاضل صقر عتيبه

المشاركة الأصلية كتبت بواسطة binhlailبن هليــل (المشاركة 87537) صح بدنك ولا هنت بارك الله فيك سعدت بحضورك وردك الراقي لك خالص الود