صباح الخير يا وردة حياتي=يا بسمة حب من حمر الشفاتي
غلاك أغلى من أقرابي وذاتي=يا روح الروح يالهفة غـرامي
يانور الصبح يا شمعة مسايه=يانزف الجرح يا بسلم شفايه
ياليتك دوم موجوده معايه=ما كان الشوق طير لي منـامي
سهرت الليل لبعد الغباشي=مخاصم للمخدة والفـراشي
غرامك نار تشعل جوف جاشي=سناها واصل لحد العظامي
سرا بي هاجسي وأقرب فصوله=يا طول الليل من دونك يا طوله
قضيته مير ما نلت البطوله=على ليلي بعد غبتي سـلامي
يا كل الحب يا عمري يا شوقي=زرعتي للهوى داخل خفوقي
غرامك دم يجري في عروقي=يغذي للمشاعر بالهيامي
لكن الحظ وظروف الليالي=حدتني عنك يامشغل لبالي
ورب العرش يعلم بالتوالي=لكني منك أنا جيعان ضامي
يمر العمر وأيامي تقافا=سنين عجاف وأيامٍ(ن)عجافا
جميل العمر خليته خلافا=مرامي ما تحقق لي مرامي
بعدك العمر ضايع من ضياعي=شريت الحلم لكن ما يباعي
زماني صار من سقط المتاعي=وهذا يا غلا زبد الكلامي
يا مشعل جمرة الأشواق فيه=فدتك الروح دام الروح حيه
بقدمها على طيفك هديه=يا نبض الروح عداك الملامي
مساء الخير يا وردة حياتي=يا بسمة حب من حمر الشفاتي
غلاك أغلى من أقرابي وذاتي=يا روح الروح يالهفة غرامي