محظوظ يالفنجال بالعون محظوظ=أنامل المترف لشفته ترفعــه
وانا اتحرق شوق مغرم ومغيوض=البعد مانعني والاقراب تمنعه
لا من بغيت ادني من الزين مرفوض=حتى الدروب تردني عن مرابعه
اقبل واقفي خاطري دوم مقبوض=الصدر ضايق ماش علم ن يوسعه
كنه على ماقيل بالعوج مرضوض=لكن على شأن الغلا طاح بأربعه
كن الهوى مفروض من ضمن الفروض=في داخلي ما يوم تهدأ زوابعه
عليك ياللي عنك ما شيء بيعوض=قلبي بحبك ياهوى الروح مرتعه
جوفه بروق الشوق والوجد بتنوض=تشعل مشاعر بالحشا ثم تلسعه
تسلعه لسع الجمر بالكف معروض=شاوي لبطن الكف ومحرق إصبعه
أوجاعنا بالكاش ما تأخذ قروض=كلٍ(ن)على ماهو كتب له بتدفعه
حكم القدر نافذ على الكل مفروض=ولا كل ما ناله بنادم بينفعه
هذا قدرنا حكم ماهو بمنقوض=حيِ(ن)نهلي به وحيِ(ن)نودعه
ما كل فنجالٍ(ن)موفق ومحظوظ=وأنامل المترف لشفته ترفعه