القوافل العربية - مذكرات شاب طائفي من العصر الجميل

قصة ذكريات عباس
شاب من الطائف🌿
...( قصة ممتعة و جميلة بجمال الماضي)......
..............
👇🏻
رشيد، شاب كان يعيش مع أهله في قرية (جلاجل) في نجد وسافر واستقر بالطائف عام ١٣٧٧ هجرية ليدرس في دار التوحيد، ولا سبيل لتمضية الوقت عنده الا بالقراءة.

وفي ذات يوم اشترى بثمان قروش من بايع الكتب القديمة بزقاق الخميس (السيد) كتاب قديم يحوي قصة (خالتي كدرجان)، وقد تمزقت بعض صفحاتها من كثرة القراءة، ليتسلى بها. عندما وصل للبيت وفتح الكتاب العتيق وجد بين دفتيه دفترا صغيرا منسيا (ابو عشرين) مزقت غالب اوراقه، ولم يتبق فيه سوى الغلاف وست ورقات، وعلى الغلاف صورتين احداهما للملك سعود والأخرى لجمال عبد الناصر وهما يؤديان تحية عسكرية. نظر الى الصورتين وهم برمي الدفتر الممزق، فلمح بداخله كتابة بالحبر الأزرق، تشغل صفحتين من الست صفحات، فدفعه الفضول لقراءتها، فوجدها مذكرات يومية لشاب من الطائف أسمه عباس وفيها:

@ اليوم الاثنين عّم الفرح البيت بدخول شهر رمضان ١٣٧٤ نسأل الله ان يعيننا على صيامه وقيامه، وبدا رمضان هذه السنه مع بواكير الحماط والبخارا والتوت.

@ اليوم الأربعاء الثالث من شهر رمضان، نزلت مع أبوي واخواني الى خان الملطاني، ورحنا للخياط (عّم حميدو) وخيطنا كل واحد ثوب وسراويلين للعيد.

@ اليوم الخميس ٤ رمضان نزل أبوي للسوق بيصلى التراويح في مسجد مولانا الهادي ويجيب فواتير أقمشة حريمي لأمي وخواتي عشان يختارو القماش اللي بيفصلوا منه كرت، وسراويل، وسداري، ومقانع، وكيبان للعيد.
ملاحظة : احنا مو زي برا، سمعت ان الحرمة تروح السوق بنفسها والعياذ بالله.

@ اليوم السبت ٦ رمضان أرسلتني أمي بالقماش اللي اختاروا بعد ماجابو ابويا لخاله (فتو) تخيطهم لهم عشان يخلص قبل العيد، وقالت قل لامك يكلفهم أربع ريال وتلات ارباع.

@ امس يوم الجمعة بعد مارحنا نصلي الجمعة ورجعنا، لقيتا أمي وخواتي لفو الجلايل، ودهنوا قزاز البيت والمرايات بالنشا والماء، وغطوا العفش بالشراشف البيضاء.

@ اليوم ١٦ رمضان جاب أبوي ثيابنا وسراويلنا من الخياط، واشتري لنا عمم، وكوافي، وكمان سمايد بيضا ومدس واشترى زينا، وجاب حاجة لامي بس مدري إيش هيا.

@ اليوم ٢٥ رمضان نزلت السوق مع ابويا، وكان كل الناس هابين على حلاوة العيد، والزيتون، والأشار وسمعت (عّم صمدوا) ينادي: يا رجال قوم بالله عليك قوم واشتري مني حلاوة حلقوم، يا بنت يا فوزية لا تفوتك الحلاوة اللوزية، وعم (ناجي) النقلي اللي يبيع حوايج الدبيازه يقول: هنا القلادة والزبيب يا مصلي على الحبيب.
ملاحظة: ما حصلنا جبنة طيبة ووصى ابويا عّم خضر القرشي يجيب لنا جبنه غنمي جديده بكرا .

@ اليوم ٢٦ رمضان جاب ابويا رجالين، شكلهم يمنا، وصارو يضربو السجاد بالعصي عشان يطيح منها الغبار وتنظف، وقلهم تخلصوا قبل الفطور عشان الليلة ليلة القدر ونبقى نصلي التراويح والتهجد في مسجد سيدي عبدالله بن العباس.

@ اليوم ٢٧ رمضان أرسلت أمي (الصفر والنحاس) اللي هي السمور، والدلال، وتباسي الشاهي النحاس واشياء ثانية إلى (عبدو) ملمع الصفر عشان يجليها.

@ اليوم ٢٩ رمضان أمي وخواتي نظفوا البيت، ونقلت (ستيتا) الجلايل والمساند اللي تنظفت من مكانها الاول إلى مكان ثاني، عشان لما يجينا احد يحس (يعني) أن فرش البيت تغير.
ملاحظة: بيت عمي في هذا العيد نجدوا المساند كلها، وأشتروا جلالتين وثلاثة حنابل عشان العيد، ما شا الله عليهم هما فلوسهم اكثر.

@ اليوم الأربعاء اول العيد رحنا (أنا وسيدي واخواني) مع ابويا للمشهد، وكانت أمي وخواتي في البيت يجهزوا الجبنة، والزيتون، والأمبا، والأشار، والزلابية، والدبيازه، وبعد مارجعنا أعطتني أمي دبيازة ومعمول وديتها للجيران، وأعطوني هما قرص مله لنا، وبعد ما افطرنا رحنا نزور عماني وخلاني وبيت جدي.
ملاحظة: الحريم عندنا مايروحوا للمشهد، سمعت في مكة يروحوا.

@ اكتب وانا تعبان في المغربية بعد مارجعنا للبيت وبنام بعد العشاء على طول لانه هذي هي الليلة "اليتيمة"، وهي الليلة الوحيدة من ليالي العيد الثلاث اللي ينام فيها كل الناس من بعد صلاة العشاء على طول.

@ ٢ شوال ١٣٧٤ وديت اخواني الصغار يلعبوا مراجيح في برحة الزرقي، وجلس سيدي مع أبويا لاستقبال المعيدين، ويعطوهم عصير الزبيب، والشربيت، والتوت، ويمكن بعضهم يعطوهم قهوة ومعاها هريسة، والا دبيازة، ولبنية.

انتهت يوميات (عباس) عند اللبنية وكان (رشيد) قد انسجم معها وأعجب بها فبحث في الأوراق الاخرى فلم يجد شيئا، وحاول ان يجد الاسم الكامل (لعباس) ذاك الشاب الطائفي، الذي بمذكراته فتح لرشيد باب جديد من المعرفة، وعرفه على أسلوب للحياة مختلف فلم يجد مايدل عليه. فنزع الورقة من الدفتر وارفقها برسالة سيرسلها لزميله (دحيم) الذي يدرس في المعهد العلمي بالمجمعة وكتب له في أسفل الرسالة:

ملحق خير:
انظر للورقة المرفقة، (اكتشفت ان الناس تستعد للعيد في لبسها وفي بيوتها، وتآكل حلاوة وجبنة فيه، اما نحن نقول ليش تحلنا بطونا في العيد، اقرأ يوميات عباس، مافيه شحم ولحم، وجريش ومرقوق، فيه شي اسمه دبييييييازه).