الزير يا هلال صوته يوم دقوبه=أكثر قلوب العرب يا هلال يطربها
المال والجاه والمزيون مرغوبه=ما تشبع النفس منها لو تعذبـها
كلٍ(ن)مسجل محاصيله بحاسوبه=وأنته عرفت الحياة ومن تجاربها
الناس يا صاحبي غالب ومغلوبه=دنياك ما هي بتصفي لو تغالبها
تضحك وتبكي وحنا وسط غيبوبه=وأيامنا ناشبة فينا مخالبها
سفينة الحب لأهل الحب مركوبه=والموج يومي بساريها وراكبها
واللي معلق فؤاده حب رعبوبه=ما هو بمرتاح منها لو يجنبها
وإن نالها لو صفت له يوم بإعجوبه=ما كل الأيام تضحك له ويعجبها
والله يعين لمعنى راح محبوبه=النفس تجزع ليا قفوا حبايبها
الناس تمشي بدرب الود مسلوبه=حب الهوى يا هلال النفس يسلبها
يسلب عقول البشر بأفعال منكوبه=والنفس ما تنتهي والحب حالبها
طول العمر فوق عود الغي مصلوبه=ما تنتهي لين حبل الموت يجذبها
ولا كل منهو تولع نال مطلوبه=دنياك تتعب لطالبته وطالبها
تضحك لك بنيةٍ(ن)ودرة ومقلوبه=ياكثر صكاتها مدري مقالبها
لكن على قولهم دلتك مشروبه=ما يطعم لطعمها يكود شاربها
ويا حظ منهو توفق وأحسن التوبه=ريح لراسه من الدنيا وحاربها