معاد باقي بالعمر كثر ماراح=قالوه قبلي متعبين النجايب
أقولها من جد مانيب مزاح=والعلم عند اللي يدير الهبايب
قامت مجا هيمي عن الخد تنزاح=تبدلت بالوضح والبال طايب
الفرق واضح بين ممسى ومسراح=يمسي شباب ويصبح الدقن شايب
على حساب البدو نصف الميه طاح=ومن الكبر مانيب خايف وهايب
خوفي من اللي دونت فوق الألواح=بكره ليا رزة علي النصايب
ماينفعون اللي لهم بعدي إنياح=حتيش لوتذرف أدموع الحبايب
أما سعيد بجنة الخلد مرتاح=وإلا شقي للنار فوقي لهايب
واللي يزيد أجراح قلب العنا أجراح=وقت ٍ قضيته بين غي وطرايب
كم لي وأنا في غبت الغي سباح=لين اكتشفت اللي بها من غرايب
حاولت أعدل النفس في درب الإصلاح=واحتدها شيطانها للمصايب
يانفس متقفيك ديان الأرواح=وإن مستعديتي فمسعاك خايب
يانفس مابينك وبين الله إسناح=توبي قبل تكثر علاك العقايب
ياالله يامن ترفع الطير بجناح=أبقدرتك مابين الثرى والسحايب
تغفر لمن دمعه على الخد سفاح=ذنبه عظيم و ملتجيلك وتايب
بدللي السيات حسنات برباح=وأدخلني الجنه ياجزل الوهايب
وصلاة ربي عد ماالصبح ينباح=عليك يالمبعوث بالحق جايب