ياطيوف الشوق شوقي كل ليلة في تزايد=علميني ياطيوف الشوق بالله كيف اسوي
يشتعل في داخلي حبٍ(ن)مثل نارٍ(ن)وقايد=لا ذكرته ياطيوفه يختلف فكري وجوي
ما يريحني فراش ولا تهنيني وسايد=ياطيوف الشوق حبه حبل بعروقي متلوي
الهوى يحرق لروحي والمصيبة بالبعايد=والظروف تحول حظي معه بلحيلٍ(ن)مهوي
الضلوع أحسها صارت من الونة خمايد=والفؤاد أحس به ميسم من اللهفة يكوي
الهوى والشوق والحرمان للمشتاق كايد=ضاعت الفرصة وخالف نو محبوبي لنوي
أتقلب في فراشي والأمل بالوصل نايد=يأس عمري ياطيوف الشوق بفراشي متطوي
كل ماسريت طيفه عاد لي بالتو عايد=يبست أرياقي وموتي من عطش مابه تروي
ياطيوف الشوق قلبي طاح به ماهو محايد=مابقا عندي حلول وضاع ماكنت متنوي
الجروح تزيد والأحلام ما جابت فوايد=والمشاعر كنها تقلا على جمر متشوي
الأماني غررت بي والزمن نصب مكايد=كل ماحاولت أعدلها تزيد السوء سوي
كل ماقلنا تزين ظروفنا جدت شدايد=الخطاوي تبتعد وفراقنا ذئبٍ(ن)يعوي
مابقا غير المواجع والتوجد والقصايد=فاتت الأيام مابه عاد يمدينا وتوي
ياطيوف الشوق شوقي كل ليلة في تزايد=علميني ياطيوف الشوق بالله كيف اسوي

المشاركة الأصلية كتبت بواسطة نجم العرب (المشاركة 144870) الله الله دائما تتحفنا بالراقي من قصائدك صح لسانك مدد ماهو عدد تقبل التحية

المشاركة الأصلية كتبت بواسطة الحر النادر (المشاركة 144872) صح لسانك لين ترضي ابداع شاعر بيض الله وجهك

صحت أبدانكم سعدت بحضوركم


لا عدمتكم


لكم خالص تحيتي

صح بدنك ولا هنت



سعدت بردك الطيب

المشاركة الأصلية كتبت بواسطة عبير الشوق (المشاركة 144878) احساس وشاعرية فاق التصور قرأتها صباحاً ليكون طعم صباحي مختلف بنكهة الشعر الدافئ استاذي ابن هليل دمت سامي الإحساس

أسعد الله صباحك بكل خير

شكرا لحضورك المميز وردك العذب

لا عدمتك


لك خالص تحيتي

صح بدنك ولا هنت


الاروع ذوقك وحضورك