تقول الغالية مسكانك أنته بأيسر الصدري=تحت حدب الضلوع أنت الوحيد اللي سكنت بها
وأقول أنتي سكنتي بكل عمري يابعد عمري=ملكتي للجسد والدم والأفكار متعبها
غديتي في عروقي مثل دمٍ(ن)بالجسد يجري=ياغاية حلم عمري والمشاعر دوم تطلبها
هواك أشد من نارٍ(ن)وقلبي داخل الجمري=ياجنة عشقي المجنون لو زادت لهايبها
أحبك حب موقوفٍ(ن)عليكِ وحدكِ(ي)حصري=غرامٍ(ن)لو يقسم فوق كل الناس يسلبها
عقولٍ(ن)راسخة قبل الغرام بحالها تدري=لكن تصير من عقب الهوى ماحال يعجبها
بعد هذا فديتك قارني بين أمركِ(ي)وأمري=بعدها تعرفي حالي وبعدك كيف عذيها
تدافع لك لحون الشعر وأنتي ملهمة شعري=على شانك لحون الشعر تصدح في محاربها
كتبنا لين ملينا الدفاتر وإنتهى الحبري=ولا زالت مشاعرنا تزف أحلام نرغبها
شربنا وإرتوينا من هوانا الطاهر العذري=وباقيها على ربك خسائرها ومكسبها
سنين طوال عالق بالصبر لين إشتكى صبري=تسراني حلوم الليل وأطيافٍ(ن)تلاعبها
أصدق للحلوم السارية لا مطلع الفجري=وليا بان الصباح أحلام ليلي عدت أكذبها
على الله مشتكى حالي وحالك مجري القدري=عليمٍ(ن)بالسراير والجروح اللي نحس بها
لعل الله يفرجها يجمع شملنا بدري=وربك خالق الأنفس وربك من يحاسبها
بعد قلتي سكنت بجنبي الأيسر من الصدري=فديت الجنب الأيسر والضلوع اللي سكنت بها