ليت منهو يبادلني جميل المشاعر=يقرب شوي يمي واقرب شوي يمه
نكسر الحاجز اللي للمحبين قاهر=لين يرتاح نبض القلب ويروق دمه
يا وليفي صدودك مثل طعن الخناجر=والبعد ياعشيري صافي الود سمه
لا متى يا مناتي عن ملاقاك صابر=قلبي اللي يودك كبر البعد همـه
كل ما قلت:جو الحب بيزين باكر=زود الحظ فوق الهم والغم غمه
كل يومٍ(ن)يعدي منه يارب ساتر=لا يسوي بروحي من فعوله مطمه
المطامع تلاشى والمواجع تكاثر=آه من حظي اللي كل موجع يخمه
أبعد اللي أريده غصب للقلب كاسر=مايراعي جروح ولا يراعي لذمه
ليت حظي يجاملني ولو جبر خاطر=مير ياشين حظي ماش فرحٍ(ن)يتمه
يا سهوم الأماني دام حظي مغادر=غادري لا ترجي حظ ظالم بحكمه
راح عمري بلاش مضيعه حظ عاثر=بعثرة كيف يقوى بعد طشه يلمه
أبعد اللي يبادلني جميل المشاعر=ماهو بعاد يمي راح ماني بيمه