سلام تسليم الوفا ينصا الجبال النايفات= اللي على خط المصيف نشوف حد اطرافها
ثبيت بيت الحق رمز الماضيه والحاضرات= يامن عين لي غايبه ياثبيت منهو شافها

يامرحبا ترحيب وافي للرياجيل الثقات=تنصى الرجال اللي تغلق فاللزوم اسلافها
لن كان فيها وسم ماهي غاديه وقت الثبات=يخبرك عنها من نشدته لا ذكرت اوصافها

يااهل الدلال اللي تفوح بهيلها ومعوشرات= الكم بقا من عزوة(ن) مايختلف ميقافها
انته علومك ياوسيع العرف اقول مصلحات= جهنم الحمرا ماهي كعبة حرم تطافها

حنا ليا ضاق الزمن فوقك نفك المعضلات=سود الليالي ياسلمي حطتك تحت لحافها
وانا ومثلي مالكم عني ولا عنهم غناة=في ساعة(ن) لاضاقت الدنيا علاك تعافها

كل الجمال اللي تهادر بالحمول محملات= مار النياري كل ماشبت جهنم حافها
انا اتشرف بالرجال اهل العلوم النافعات= ومرجاعكم للحره اللي جولكم عرافها

بيني وبين سليم موثوق العنوه والصلات=لكن خلك قدم عيني لاتروح اخلافها
لاتحتري مرجاعنا بعدين ماتقدر تبات=نتعبك في نقل الحمول اثقالها واخفافها

مابيني وبينك يكود ام الخشيب المثمنات= اطمر وخلك في ظهور الخيل ياسيافها
بعد الثبيتي يبست ثمار الغصون السابحات= الله يمسيكم بخير بكحلها واصرافها

ياعاني العتبان حبك لا يحول فالرحاة=كم لحية(ن)من فعلنا طارت بغير اقلافها
الله يعوض فالجبرتي والعلوم الماضيات=والا الثبيتي من رجال المعرفة واشرافها

عندي خبر مابه خبر وتشيلهن منكسات= داخل على الله لاتفك جرابها وكتافها
عز الله انك شاعر العتبان يامال الغناة= ماانته بمثل اللي حرفها والتوى محرافها

هاذيك روس بلا لحى واكيد من دون شنبات=يكثر شعرها يا صبي سليم فوق اظلافها
وانا اسمع أنك شاعر السلمان ماتبغى وصاة=تطلع وتنزل مار غيرك محتكم مشرافها