من جنوب البلاد ليا شمال البلد=بكل خطوة على ولفي من الله سلام
غبت عنها وأنا قلبي لحبي لحد=ماأحد يدري عن اللي بيننا بالأنام
ما تخيرت عنها البعد بالكيف أبد=مير هذي ظروف الوقت فعل وكلام
أتصبر وأقاوم للتعب بالجلد=عل ربي يفرجها وتغدي تمام
يالله إنك تبدل للعنا بالسعد=تجمع الشمل قبل الروح تغدي عدام
العهد بالوليف السبت قبل الأحد=بعدها ما وصلني منه ناقل علام
والله أعلم وش اللي ننتظر له بعد=غيبة أيام وإلا شهور وإلا عوام
يا وليفي توكد ما تغير عهد=العهد ما يبوقه غير ولد الحرام
حدني وقتي المقرود فوق البعد=والمقادير تجري للرجال الحشام
ياوليفي تصبر زيد جهدك حَهَد=لا يغرك عذول ولا تسمع ملام
لو تزيد الشدايد حتم بعد النكد=ينفرج همنا والنور عقب الظلام
لو يطول الغياب ولو يزيد السهد=الهوى ما تغير يافراخ الحمام
ونتي كل ما ونيت مثل الرعد=كل ما زارني طيفك بصحو ومنام
آآه من زفرةٍ(ن)بالصدر تلهد لهد=تجرح القلب وتسمم لصم العظام
ظامني حظي العاثر وفوقي جمد=ياعسى من هويته بالزمن ما يظام
من جنوب البلاد ليا شمال البلد=بكل خطوة على ولفي من الله سلام