السلام من المشاعر والقصيـد=يالوليف اللي نبض قلبي وجاك
مستحل الروح عن عيني بعيد=كل يوم يزيد في نبضي غلاك
ساكنة بالنبض في حبل الوريد=كل دقة قلب ترقص من هواك
الهوى والشوق بعروقي تزيد=من سنين القلب ما لحظة نساك
لو قلبي من صخر وإلا حديـد=بذمتي ليلين من شدة بهاك
ما عشقت من البشر غيرك فريد=ياشبيه الحور بأوصاف الملاك
من بعد الغيد ماهن عاد غيد=الله اللي كملك والله رعاك
الحسن كله بذاتك والمفيد=قاهرة كل العذارى من حلاك
جامعة كل الفضائل من تليد=الأدب والذوق ياعمري زهاك
الحقيقة حبك بقلبي شديد=ومستحيل القى بذا الدنيا كماك
والله إني يالغلا غيرك مأريد=ما شغل للفكر وإحساسي سواك
كل يوم بداخلي تصنع جديد=يا عسى كل البني تغدي فداك
أنت غاية خافقي للروح سيد=الله اللي سخر القلب وعطاك
أبتدي بك وأنتهي بك ثم أعيد=كل ذرة بالجسد تطلب رضاك
من بدايات الهوى أنت الوحيد=خافقي باع البني بعد شراك
أنت فيني للهوى والحب عيد=عالمي كله وضعته في يداك
عيش عمرك مهتني دايم سعيد=لا تفكر بالشقا وأنا معاك
هات لي كل العنا ضيفه رصيد=في حسابي دون عن هذا وذاك
ما يهم أفيد دامك مستفيد=ولا يهم أروح بدروب الهلاك
المهم تكون لي نبض وقصيد=يالوليف اللي نبض قلبي وجاك