عسى البارق اللي بعد وقت العشاء لاحي=يسقي ديارك يابعد كل من حبيت
يابو خد كنه بالحلا لون تفاحي=ياليت الزمن يدنيك مني ياليته ليت
وانا لو بغيت اجيئك مسرى ومسراحي=على حافي الاقدام يالترف ما عييت
اجي لك لو إن الموت دونك والأرماحي=سهم غير سهم العشق ما ظنتي بيميت
انا ميتٍ(ن)من من عام الأول يا لماحي=غرامك مفتت خافقي بالهوى تفتيت
أنا فيك طاح القلب يوم العقل طاحي=جذبت المشاعر كلها قول وش خليت
نهبت الفؤاد اللي قبل منتبه صاحي=وشبيت فيه الشوق ناره بلا كبريت
وأنا أشهد إن العشق للعقل ذباحي=دليلي طيوفك تشغله كل ما صليت
أشوفك معي ما بين عيني ومسباحي=تنسيني التسبيح وأذكر ليا مريت
زمانٍ(ن)مضى يوم الهوى منك مرتاحي=قبل تشغلك دنياك عني بكيت وكيت
زماني بعد بعدك طفأ نور مصباحي=وليلي بعد ما غبت من سهرته مليت
ما باقي يكود الوجد بيجدد جراحي=وينكش جروحٍ(ن)قبل بمواصلك داويت
بكى ليلي السامر بعد ولت أفراحي=وناح القصيد العذب من كثر ما ونيت
يا عذب اللما حمل الهوى كيف ينزاحي=تعب منه حالي وأنت يا غايتي ما جيت
أساهر نجوم الليل لا قبل الأصباحي=وأغني بيوت الشعر بيتٍ(ن)يجر لبيت
على ساري الهاجوس تعتيم وإفصاحي=تزاحم هجوس الشعر فيني بلا توقيت
ليا من دمي فالحشا بالشعر فاحي=تغنيت لك بأعذب قصايد ليا غنيت
يالبيه يا طيفٍ(ن)معه خافقي راحي=يلبي قصيدي كل ما للغلا لبيت
عسى البارق اللي بعد وقت العشاء لاحي=يسقي ديارك يابعد كل من حبيت