يا فيصل النفس تأمرني وأطاوعها=تتبع هوى القلب في مقفا ومقبالي
الخير والشر يا فيصل يصارعها=من عدة سنين هذا بالزمن حالي
بعض المطالب عزيزة كيف نمنعها=بالذات لا من طراها طاري الغالي
ما تقبل أحدٍ(ن)على حبه ينازعها=خطٍ(ن)حمر عندها في كل الأحوالي
الحب كله درسته في مراجعها=قريت بكتابها سعدي وغربالي
لو تقلع العين يا فيصل بأصابعها=في ذمتي ما يكدر فعلها بالي
وثائق الحب فوق القلب طابعها=جميع ماهو بيحلا له ويحلا لي
أبواب قلبي عن العالم مشمعها=قلبي مخصص لناسٍ(ن)قدرهم عالي
النفس من غيرهم قلت مطامعها=ما عاد لي بعدهم مزيون يطرا لي
الروح في حبهم ربي مولعها=أغلى على القلب من جاهي ومن مالي
الله وهبني محبتهم وزارعها=في داخل القلب منزاله ومنزالي
لو كان نفسي ثقيلاتٍ(ن)مواجعها=البعد عنهم ثقيل وصعب ينزالي
والله ما أقصر مواجيبي ولا أقطعها=بمد حبل الوفا لو كان مرسالي
أيامنا اللي مضت لازم نرجعها=الحمل لو هو ثقيلٍ(ن)غصب ينشالي
يالله علينا ليا ضاقت توسعها=تجلب لنا اليسر بعد العسر يا والي
يا فيصل النفس تأمرني وأطاوعها=تتبع هوى القلب في مقفا ومقبالي

المشاركة الأصلية كتبت بواسطة عبد المجيد (المشاركة 177320) الله الله ع الإبداع صح لسانك يا شاعر القوافل اول رد يا شيخنا ونبي حلاوة العيد هههههههههه