تغيب عني عام وتقول ولهان=لو كنت صادق يمدي الوجد جارحك
ياللي تحسبن الهوى لعب ورعان=لا تشتكي وتقول ذا الشوق ذابحك
رميتني بالبحر وتقول شفقان=وأنا الذي أغرق بشبر بمسابحك
ترى صدودك ما يحاوج لبرهان=حبل الجفا الممدود من وقت فاضحك
لو جيتني تطلب عذر وأنت غلطان=قسم برب البيت لرضى وأسامحك
حتى لو إني منك يازين زعلان=أضحي بحالي وأراعي مصالحك
حيثك بقلبي غير عن كل إنسان=أحب كل مافيك حلوك ومالحك
ما فيه يوم أنساك وإن كنت نسيان=ما تغيب عن عيني دقايق ملامحك
صورتك ترقص دايمٍ(ن)صوب الأعيان=أذكر زماني معك وأذكر مطارحك
ما تدري إني منك ياشوق ذبلان=كني على ما قيل خرز مسابحك
العمر لو تطلبه من دون الأيمان=يا فاتني بعطيك عمري وأفرحك
مهما تسوي في زودٍ(ن)ونقصان=قلبي وفكري كلهنَ مسارحك
أرقص بها طول الليالي والأزمان=سو الذي يرضيك ماني بناصحك
خل الخسائر لي لا كنت كسبان=هذا المنى إنعم بكامل مرابحك
لا تشيل هم عتاب لو كان ما كان=قول الصراحة مثل ماني مصارحك
الأمر كله يابعد كلهم بان=وإن كان عندك شك فنشد جوارحك
دامك لقيت بغيبتك ناس خلان=ماني بلا ذامك ولاني بمادحك
بضحك لو إني من سواياك غضبان=وليا شعرت بضيقتك قلت:أمازحك
تغيب عني عام وتقول ولهان=لو كنت صادق يمدي الوجد جارحك