يا هلي زهبوا لي مزودي فيه زادي=عازمٍ(ن)للسفر لديار عنكم بعيده
شنطتي كملوها بالثياب الجدادي=لا تحطون فيها غير لبسة جديده
أربع بدال وأربع من ثياب البلادي=والغتر والعقال وبشت دقة فريده
بتمشى وأوسع خاطري والمرادي=أكسب لعلم وأنشر للعلوم المفيده
السفر من يبا به فايدات إستفادي=يغسل النفس وتصير العزايم شديده
وأدري إنه غيابي لن حصل شيء عادي=ما يبا يفقد الشاعر يكود القصيده
غير شعري فلاني خابرٍ(ن)لي ودادي=المودين قلوا والعطايا زهيده
شح منهو قديم الوقت بالجود جادي=ما بقى غير ذكرى لليال السعيده
ذكرياتٍ(ن)قديمة باقية في فؤادي=ما تغير ولو وقتي نوى لي مكيـده
تسقي القلب بحلوم الهنا في رقادي=وإن بغيت القصيد يزين لحن النشيده
لن تذكرت بعض وصوف غاية مرادي=هاض بالي بطاروقٍ(ن)يمجد مجيده
حبها ما يرده عن خفوقي بعادي=عشقها راسخٍ(ن)بالقلب مثل العقيده
طيفها كل ما حليت دارٍ(ن)ينادي=بالصحو والمنام الطيف قاري جريده
ما يفارق خيالي بالمشي والقعادي=كل ما اسهو ثواني زج في اتغريده
مثل ما قالت الأمثال محكم قيادي=من سنينٍ(ن)قديمة والوثايق جويده
ما يعرف التسامح بالهوى والحيادي=كل رمية من ايدينه بقلبي سديده
لين حطم شموخي والكبر والعنادي=صرت مطواع والمطواع صارت عنيده
يا هلي زهبوا لي مزودي فيه زادي= عازمٍ(ن)للسفر لديار عنكم بعيده