سلام مني يابعد كل غالي=يا حامسة قلبي بالأشواق حمسا
قالت:هلا بك يا بعد كل حالي=أنا حسبتك بعد حجتك تنسا
قلت:المحال إن كان فيها محالي=أنساك لو لحظة صباحٍ(ن)و ممسا
أنتي لقلبي نبض وإحساس عالي=لا بالله إلا روح وأحلام نفسا
تطمني دايم خيالك ببالي=أسمع لطيفك مروي السمع همسا
شوق وغرام وحب منطوق حالي=ومشاعري عن باقي الناس خرسا
أنتي حياة القلب فأول وتالي=هواك علمني بالأيام درسا
أنا بدونك هيكل إنسان بالي=ما حركت قلبي من البيض نعسا
وأنا معك إنسان راقي مثالي=غرست حبك بالمعاليق غرسا
هواك راسخ مستحيل الزوالي=مهما علي البعد والوقت يقسا
هواك فيني مثل راس الجبالي=لا بالله إلا ظنتي حبك أرسا
هواك موج وطحت ماني مبالي=أنا بموجك منغمس حيل غمسا
عدة سنين بحسب عدً الليالي=ترمي بي الأمواج في غير مرسا
ودي و ودي مير يا هم لالي=من حر ما بي حابس الوجد حبسا
ودي تكوني في حياتي قبالي=أرتاح وتبلين لعروق يبسا
ينزاح همي ياغلا وإعتلالي=مير الزمن والحظ يرسم لنحسا
العمر يركض والزمن ما يبالي=تعسا لعمر بدون لقياك تعسا
الخاتمة حبك يفوق الخيالي=واقع يزيل لكل شكٍ(ن)ولبسا
سلام مني يابعد كل غالي=يا حامسة قلبي بالأشواق حمسا