يا ويل حالي من عيون الخراعيب=ما تعرف الرحمة ولا المرفقيه
جتني تسوق الموت ما هابت الشيب=اللي كسا راسي وفي عارضيه
يابنت ياللي نادرة بالرعابيب=وشبك تسوي في هذا السويه
العين عين اللي عطيب المضاريب=من صابته بالرمش روح ضحيه
يا بنت ذئبٍ(ن)صوبت بالنظر ذيب=والعين تسبق للقدر بالرميه
ضعت بهدب عينك عسى فالك الطيب=ما عاد تنفعني شفاعة حميه
حبك شلع قلبي مثل شلعة الجيب=تكفين لا ترضين فوقي خطيه
اما تعالي كملي للمواجيب=وانا بكمل واجبك يا بنيه
والا عليًه اشلعي للتلابيب=ما بعد موتي منك حاصل منيه
اسقيتي الولهان مر المشاريب=والنفس حية مير ماهي بحيه
شربت مي الحب كله غثاريب=شوق وسهر خلى عيوني دميه
إن جئتك أطلب منك بعض المطاليب=أخاف من صدة عليًه قويه
وإن جئيت بصبر وأبلع الغبن وأغيب=هذي بعد يا بنت صعبة عليه
ماني بمن يبلع غليبته ويعيب=ولاني بمن تبقى طعونه نديه
أنا سليل المجد سبع المخاليب=اللي كفوفه بالعطايا مديه
والله ما اترك طعنتي بالمهاديب=دام إن روحي في عروقي سويه
بكرة يجيك العلم ما فيه تكذيب=بشراك مني عن قريب الجزيه
ويا شين هجمات السباع المصاويب=الموت يهدى من طرفها هديه
هذا جوابي للرموش المحاريب=اللي هدبها هز للمعنويه
الخاتمة يابنت عقب التعاذيب=بقيم فوقك بالمحاكم دعيه
يا قاضي الدعوى عيون الخراعيب=ما تعرف الرحمة ولا المرفقيه