يا هوى البال يا حلمٍ(ن)مضى له سنين=والله انك بقلبي مثل نبض الحياه
مستحل الوريد ومستحل البطين=مير قلبي ببعدك ما اهتنا من هواه
كل ما أمسيت عاودني عليك الحنين=والبشر كل حيٍ(ن)مهتني في مساه
وين ذيك الليال السابقة وأنت وين=ما بقي غير طيفك خافقي ما نساه
كل ما مرني لجيت صوت الونين=والعرب ما تعرف بخاطري وش بلاه
ما دروا عن غرامٍ(ن)شايله ما يبين=ما درى به قريب ولا درى به عداه
خلف عوجٍ(ن)تثنت فوق كنز ثمين=حبي اللي كنزته بالحشا من غلاه
ما درت به عقول ولا تنوشه يدين=نادرٍ(ن)بالزمان ونادرٍ(ن)في حلاه
مكتمل بالمحاسن فيه قسوة ولين=منه تنزف جروح الشوق وأسرع دواه
لا تبسم وناظر صوب ذاتي بعين=ينمسح كل هم وكل جرحٍ(ن)براه
كمله بالمحاسن خالق الثقلين=الحسن فيه كله مأخذٍ(ن)منهاه
كان واقع زمان وصار حلمٍ(ن)دفين=يا عسى كل حلم وكل واقع فداه
ذا حبيبي وروحي لين نفنا ولين=ننبعث من مراقد موتنا يا عساه
يهتني في حياته بدنيا ودين=ما يذوق المواجع وطعم الشقاه
منية الروح مدري روح مدري خدين=مبتدا عشقي الأول وتالي هناه
كل مافيه حلو وكل مافيه زين=منتهى حسنه الطاغي مثل مبتداه
يا هوى البال يا حلمٍ(ن)مضى له سنين=والله انك بقلبي مثل نبض الحياه