ناسٍ(ن)تناسونا بعد كانوا أحباب=راحوا وحنا حبهم ما نسينا
أخذوا معاهم ذكرياتٍ(ن)بلا حساب=واحنا خذينا ذكريات السنينا
دارت بنا الأيام والوقت غلاب=أخذ جميل أعمارنا ما درينا
واليوم عدنا كننا نأسٍ(ن)أغراب=اللي نبيه بقربنا ما يبينا
كنه عن الأحباب في دنيته تاب=يقطع وحنا بالوفا واصلينا
لا من حضرنا عننا بالقصد غاب=وإن كان غبنا قال فينا وفينا
وليا سألنا ويش عنده من أسباب=رمى معاذيره جزافٍ(ن)علينا
ما هو مقدر في تصرفه لأصحاب=همه يدور حجةٍ(ن)لا يجينا
وليا عتبنا ما تحمل لنا عتاب=يالله بطبعه رب لا تبتلينـا
كثير مثله بالزمن غُرب وأقراب=تحسبه بالظاهر صديقٍ(ن)مبينا
وليا بحثنا عنه نلقاه كذاب=مودته في حين وتغيب حينا
ناسٍ(ن)تناسونا بعد كانوا أحباب=راحوا وحنا حبهم ما نسينا