الليلة الليلة من الشوق مرتج=القلب طاير والفكر معه طاير
شوقي لولفي ثج في داخلي ثج=سواة وبلٍ(ن)معه عصفٍ(ن)وماطر
السيل حادر خجني ياهلي خج=شطر فؤادي بالهوى حكم كافر
أسمع صدا الأهات بالأذن تلتج=والجرح ينزف كيف بكون صابر
الصبر مل وضاق من دنيتي هج=من هول ما سوى الهوى في هاجر
وأنا الذي أشكي من الود بالعج=كن الهوى غارز بقلبي خناجر
أعوي مثل سرحان وأرزم كما الخلج=أخاف من غدر الزمن حيل غادر
أعد لأيامي من الحج للحج=عله يجيني نلتقي بالمشاعر
أدوره مع كل قادم من الفج=مرت سنين طوال ماجا مسافر
اسج فكري في حرى غايتي سج=وأنظم على شانه قصيد بمشاعر
غلاه عندي فوق ما ياصف الهرج=مهما يطول غيابه أظل فاكر
لو الصدر مني من الشوق ينفج=والله ما بدل غرامه بأخر
سيد العذارى كلهن مالك الغنج=تفداه روحي كان غايب وحاضر
دامه غرامه بالحنايا ولج ولج=يهناه قلبي فيه ينهى ويامر
بسرج له حصان الوفا بالوفا سرج=وأركب على شأنه جميع المخاطر
الليلة الليلة من الشوق مرتج=القلب طاير والفكر معه طاير