التميدح ما يعز الرجل كانه ردي=والصوايح عمرها ماذبحت بالوقت ذيب
والنذل طبعه نذل لو تظاهر أجودي=والمذمة عيب لن جات من واحد قريب
وكل دارٍ(ن)ماتعادل معزتها بلدي=والعداوة للعدو والمحبة للحبيب
والمغانم ماتجي سهل من دون جهدي=مايموت العبد ناقص عمر وإلا نصيب
ودي الناس دوني عدا فعل ولدي=أتمنى دايم يكون بأعماله مصيب
يرفع لراسي بفعله ودعوته بعدي=خير مما طلعت الشمس فوقه والمغيب
الولد والمال فيها سعادة مسعدي=ومن ترجى رحمة الله عله ما يخيب
مأحد يأخذ غير رزقه مشي وإلا عدي=وكل جرح يطيب غير المنايا ما تطيب
مدركتنا لو صعدنا على سطح الجدي=المنايا سهوم لا بد للمرمى تصيب
ماتفرق بين الأبيض ومنهو أسودي=سنة الله بالمخاليق وإحذر يالبيب
مير ما كل البشر في حياته مقتدي=فيه ناسٍ(ن)ماتميز صوابٍ(ن)من معيب
مثل قطعان المواشي حياة بلا هدي=والمواشي تنفع بجلب وإلا في حليب
الغصون اليانعة بعد وقتٍ(ن)خُمدي=يقشها للنار بالهون قشاش الحطيب
يالبنادم جئيت مفرد وترحل مفردي=مر بالدنيا غريبٍ(ن)وراحل ياغريب
لو يطول العمر ماهو بباقي سرمدي=الليالي تنتهي مثل ما ينضب قليب
مثل ما لحدت غيرك بيومٍ(ن)تِلحدي=والمصير لجنة الخلد وإلا باللهيب
يوم كلٍ(ن)تاضع الحمل والعقل يغدي=الف عام ليوم واحد عجائب ياعجيب
ويل منهو قابل الله كافر ملحدي=في نهار يشيب رُضع من الهول الرهيب
رحمتك رباه تغفر لعبد موحدي=من خطايا دنيته عاد لك تائب منيب
يا إلهٍ(ن)تعلم بحال ساديني سدي=تلطف بحالي وترحم لضعفي يا مجيب