الزمام اللي بخشم الحضرميَّه=مثل نجم سهيل بالقطر اليماني
مستحل يمين خشم الهاشميَّه=مرقبٍ(ن)من فوق للبيض الثماني
فيه سحر وفيه سر وجاذبيَّه=حركت للشوق ما بين المحاني
ذكرتني في محاسن يعربيَّه=حسنها فعله كما السحر العماني
أشعل النيران والأشواق فيَّه=ضامر السرجوف بسهومه رماني
غز قلبي مثل غز النافعيَّه=من سهام الموت برماح وسناني
سهم رمش وسهم ردف من الصبيَّه=صابت الخفاق والخافق بلاني
ساق روحي غصب لحتوف المنيَّه=بعد حبه داخل النابض كواني
لا ذكرت لصدر زامي والشفيَّه=صحت يا ويلاه من شوقٍ(ن)غشاني
يالحبيب اللي زرع للحب بيَّه=ليت تدري عن غرامٍ(ن)منك جاني
أتمنى شوفتك روحة وجيَّه=لين ضاق الصدر من كثر الأماني
أترقب جيتك صبح وعشيَّه=علها تبري مواجيع الزماني
صرت كني من عشق للعامريَّه=أتوجع بالهوى سر وبياني
عز حالي منك يالروح الشقيَّه=تشعلين الشوق في بضعت ثواني
شاب راسي والأماني فيك حيَّه=إنتهي يا نفس جاني ما كفاني
تتبعين لنو ما قطر عليَّه=نو مقفي لا هناك ولا سقاني
كيف تلقى شربةٍ(ن)حلوة هنيَّه=من سحابٍ(ن)عنه مقسومي حداني
ما جنيتي من شقاك إلا الأذيَّه=لين نشفتي من اللوعة لساني
كل ما عالجت كيه جد كيَّه=ما نفعني لا قصيد ولا بياني
يالزمام اللي بخشم الحضرميَّه=مثل نجم سهيل بالقطر اليماني