يا حبيبي جعل يومي قبل يومك=ما تعرف النفس راحة في غيابك
ينشغل بالي ولا أدري وش علومك=خائفٍ(ن)خاطرك يكدر من ثيابك
وخائف تزعجك في نومك حلومك=خائف تتعبك لو كأسة شرابك
وخائفٍ(ن)من فكرةٍ(ن)تحرمك نومك=خائفٍ(ن)من حلم في ليلك سرى بك
أنت بحر الحب وأفكاري تعومك=كل ليل الفكر واقف عند بابك
ياحبيبي نام واترك لي همومك=الله إنه يحفظ لقلبي شبابك
لا تفكر غير في زاهي هدومك=في عطورك في جواهرك وخضابك
دامني موجود بقضي لك لزومك=وأتباهى فيك وبحضرة جنابك
أنت تاج المُلك في قومي وقومك=فوق راسي والبني حشمة تهابك
راحتي من راحتك ماني بلومك=لو زمانك غصب والبعد إنتحى بك
دام قلبي حي مشغلته سهومك=يا عسى سهم العنا ما يوم صابك
عل لوعات المواجع ما تسومك=ما تكون بيوم صفحة في كتابك
يا عديل الروح وأحلامي ترومك=من سنين القلب مشتاق لسحابك
المشاعر تنتظر صحوة غيومك=ودها برحمتك تسبق عن عذابك
كيف مدري كيف ترحم لمحرومك؟=عاقبه وقته وخائف من عقابك
يا حبيبي جعل يومي قبل يومك=ما تعرف النفس راحة في غيابك