تخاصمنا كما الأطفال ونصالح كما الأطفال=كذا ودي حبيب الروح دوم يشاكس لـودك
أجيك بلهفة العاشق وأروح بحسرة المغتال=وأعود بيومي الثاني أشم الورد في خـدك
وتسرقني بنظراتك حيا مدري وله وهبـال=أحس برعشتك لا لامست يدي طرف يـدك
لكنك ما تصارحني تعارض للجواب سوال=تمنع ثم تمنعني وتفصـل حـدي بحـدك
حبيبي لا متى نبقا انا وإياك في ذا الحـال=ترى طول الزمن لا هدني يافاتني هـدك
أشوف الشوق بعيونك لكنه صعب ماينطال=وانا اللي لو طلبت عيوني الثنتين ما أردك
حبيبي وش نهايتنا تبي نقعد قفـا وإقبـال=نعاني ما نعاني وأنت يا قربـك ويابعـدك
تبينا نقضي الأعمار نشكي حظنا الميــال=ونشرب من عطشنا آه ياحري ويابـردك
إذا تقدر انا مقدر وهذا يا هـواي محـال=محال إني أحس بحاجتك وأروح ماأمـدك
انا مكذب عليك إن قلت لك ترى الزمن ميال=أخاف من الهوى لايموت لا من جابه لصدك
تمر شهور بعد شهور وأيام وليال طــوال=وانا محتار ماني عارف بهـزلك ولا جـدك
تخاصمني كما الأطفال وتصالح كما الأطفال=كذا ودي حبيب الروح دوم يشاكس لـودك