متى عيني تشوف اللي لها بين الضلوع ربوع=مواطنها بوسط القلب وعروقي لها أنهار
تسقي عشقك اللي بالحشا ياغايتي مزروع=نتاجه ياهوى بالي قوافي بأعذب الأشعار
متى نبضي يضم النبض في قلبٍ(ن)سجنه ضلوع=متى تطلع زهور الورد في غصنٍ(ن)غطاه غبار
متى يبرى خفوقٍ(ن)من غرامك يالغلا مليوع=وتسكن روحي الولهى على شوفتك بالأنظار
يمر اليوم عقب اليوم والأسبوع عقب إسبوع=أراقب جيتك وإلا اتصالك تطلب المعذار
أهوجس بك وأنا صاحي وأفز بغفوتي مفزوع=ليا مني حلمت بغيبتك والبعد دون الدار
بدون شعور لا بشعور انادي والحلوم فزوع=تزورك وأنت لاهي في حياتك والغرام أسرار
تجيني بالأمل وتبين المسموح والممنوع=هواجيسٍ(ن)تهدي لوعتي وتهدي الأفكار
تجدد لي أمل يرجع تواصل بيننا مقطوع=يدور الوقت بأحسن منه ننسى ما مضى لوجار
تطيب جروح توجعني ويبرا خافقٍ(ن)موجوع=وترتاح المشاعر من ملاوع وقتي الدوار
كذا وإلا كذا قلبي على عشقك غدا مطبوع=محال يحل به غيرك من الزينات مهما صار
تخيرته ولا لي عنه لو طال الزمان رجوع=رفيق العمر كله ماني بعايش بعده أعمار
يزين الحظ وإلا شان ياشافع ويامشفوع=فداك الروح ترخص لك عيونٍ(ن)دمعها مدرار
ما دام إن الهوى مشروع أكيد إن الوفا مشروع=خيارٍ(ن)مالنا غيره على طول الليال خيار
متى عيني تشوف اللي لها بين الضلوع ربوع=مواطنها بوسط القلب وعروقي لها أنهار