ياما رسمنا من جميلات الأحلام=لوحات فيها كل ما تشتهي نفس
وياما كتبنا لين نشفن الأقلام=وياما تعلمنا من أيامنا درس
وياما تعرضنا عواصيف وأنسام=وياما فرسنا الهم بقلوبنا فرس
وياما بكينا العام واللي قبل عام=وياما تألمنا من أوجاعنا أمس
حياتنا ما بين ماضي وقدام=مابه قرارٍ(ن)لا حقيقة ولا لبس
ما تستقر بحال لو بضعة أيام=دنيا تقلب كل حالٍ(ن)وله عكس
ما نعتقده الصح يطلع به أوهام=وما نعتقده أوهام يصدق وينحس
نكدح بدنيانا ونشكر وننلام=ونلوم والأعمال ظاهر ومندس
شيءٍ(ن)يوافق ما نريده ولا دام=وشيءٍ(ن)يخالف للبراهين والحدس
صراع والعبرة بما قالوا ختام=دورة حياةٍ(ن)تشمل الجن والأنس
دورة حياة تمر في عدة أقسام=تلفنا معها مثل لفة الترس
نكسب بها خيرات ونجمع أثام=أيامنا ما تفرق لجنس عن جنس
الكل يرسم له جميلات الأحلام=لوحات فيها كل ما تشتهي نفس