أشياء كثيرة بالمشاعر تفتري=والليل والهوجاس والعلم الخفـي
كل ما يجن الليل جتني تسمري=أقضي شكيل الليل طرفي ما غفي
الشوق يجلب شيء لي ما يخطري=للصاحب الغايب وللخل الوفي
ما كنت أظن الوقت فينا يغدري=أبعد مسافاته ولا هو مكتـفي
أنا بدار وصاحبي عني وري=والكبد فوقه للوصال تشفشفي
مير الليالي حكمها ما ينذري=يمضي علينا للعروق ينشفي
كل ما ذكرت اللي مضى يا مصبري=القلب جوف الصدر دقه يرجفي
الصدر من دقه مقرب ينفري=أحرق لدمي يوم جوي ما صفي
وقتي وحالي والغلا متغيري=ركضت لين الفكر من ركضي حفي
العمر كله للتواصل مشتري=على وصالك يا بعد عمري شفي
ما كنت أظن الوقت يسبق بالجري=على بعادك ما هقيتك تختفي
يا بري حالي يا وليفي يا بري=مدري من اللي عن وليفه منفي
أيام وشهور وسنين ومن دري؟=عن باقي الأيام حين تشرفي
ماني بداري عن قدرك ولا قدري=يظلم لباق العمر وإلا ينصفي
الحاصل إني كل ليلة بسهري=أتبع هواجيسي وربي يلطفي
أبيع وأشري كل ليله وأخسري=الليل يكذب والمشاعر تعرفي
إن الحلوم تجوز في دين أزهري=تضحك علي ومن جهلها تحلفي
أشياء كثيرة بالمشاعر تفتري=شيءٍ(ن)يبان وشيء عن عيني خفي