يا أريش العين ياللي لعبتك بالقلوب=خاف ربك ترى المؤمن مجابٍ(ن)دعاه
وش تبي بالتجني والجني للذنوب=قلب تقطع رجاه وقلب تمنع دواه
كافي اللي جنيته في لياليك توب=قبل فوت الأوان وقبل تشكي من آه
لا تسوي مثل حكام بعض الشعوب=يا أريش العين لا تتبع لنهج الطغاه
التجني جناية بالنظر والسلوب=وأنت لعبتك تحسب ضمن فعل الجناه
تنهب لقلب عبدٍ(ن)غافلٍ(ن)ومغلوب=لين يصبح معلق ثم تقطع رجاه
كم قلبٍ(ن)تركته كن جوفه شبوب=ياشريك المنايا ياعدو الحياه
حسبي الله على عينك وحلو الطيوب=ضيعتني من التسبيح وقت الصلاه
وحسبي الله على لونك وكف مخضوب=ذكرتني بحيٍ(ن)نادرٍ(ن)في حلاه
فيك منه كثير من الحلا يالعوب=وفيك منه قليلٍ(ن)من مزايا حياه
عيب خلي لقيته خالي من العيوب=مستحيل ومحال يكون واحد كماه
من شمال لجنوب لشرق وإلا غروب=ماشغل للمشاعر والهواجس سواه
حسن كل العذارى بكفةٍ(ن)ومحسوب=وحسن خلي بكفة والمحبة سماه
قلبي اللي تولع به محالٍ(ن)يذوب=بحسن غيره ولو إنه صدق في هواه
المحبة من الله ماتجي بالغصوب=الهوى ما نسيته والغضي ما نساه
أذكره كل ماهبت عليً الهبوب=وأذكره كل ما عيني تشاهد مهاه
أذكره بالمباهج وأذكره بالكروب=فقر روحي بغيره عندي أغنا غناه
يا أريش العين لو تسلك جميع الدروب=لا ترجى بقلبي صاحبه قد خذاه
حسب علمي وربي عالمٍ(ن)بالغيوب=ما تمنيت غيره والوفا من غلاه
يا أريش العين ياللي لعبتك بالقلوب=خاف ربك ترى المؤمن مجابٍ(ن)دعاه

صحت أبدانكم جميعا

سعدت بحضوركم المميز

لكم تحيتي

المشاركة الأصلية كتبت بواسطة عبير الشوق (المشاركة 145290) لم أرى هنا سوى كلمات من الدرر متوجه بالوفاء والحب وعمق الحنين

المشاركة الأصلية كتبت بواسطة عبير الشوق (المشاركة 145290) قد يرى الإنسان من يهوى في طيف عابر استاذي نثار شكري على ضِفاف عطائك تقديري

المشاركة الأصلية كتبت بواسطة ابن عميش (المشاركة 145293) المعهود والمشهود امام نواظر الجميع تقبل اجمل تحيه وتقدير

حيا الله مشرفينا الأعزاء