قلت:الصبر ما عاد ينفع وش الراي=قالت:عسى ربي على الحال بيعين
قلت:الوله واصل من ادناي لقصاي=ما عاد بقوى صبر يا داعج العين
كشفت لك حبي من أقصاي لدناي=سكنتك بقلبي من أعوام وسنين
شكيتك لذاتك من الحب دعواي=هواك حز القلب حز السـكاكين
يا مبكي لقلبي وسامع لنجواي=لا تقطع لوصلي من الحين للحين
طمن لقلبي عنك ياغاية مناي=لا تذبح الأحلام وتثقل الدين
تعبت وأتعبتك حبيبي بشكواي=لكن لمن أشكي لغيرك من البين
أنت الهوى وأنت الآمل وأنت رجواي=وأنت الذي عندي تساوي ملايين
شاغل لقلبي في صباحي وممساوي=وياكم ليلة منك ما غمضت عين
ما فات راح وخايفٍ(ن)وقتي الجاي=يبعدك عني يصبح البعد بعدين
بعد المسافة والهجر كل بلواي=لو صار منك الجرح بيصير جرحين
جرح البعاد اللي مصعب لي دواي=وجرح القساوة من بعد نعمة اللين
عرفت ليش أزعجت للشعر بعواي=ما كني إلا ذئب مطعون رمحين
ما عاد يهناني طعامٍ(ن)ولا ماي=عايش غناوي في حياة الفقيرين
الليل كله ساهرٍ(ن)فوق متكاي=أقلب الهوجاس من زين لا شين
مالي مسامر غير شعري ومركاي=وأحلام ليل ملونة بالتلاوين
وليا ذكرت اللي مضى زاد مبكاي=وأعظم عويل اللي فقد له محبين
يا من شفيت القلب من موجع الداي=لا تمنع علاجه ترى القلب مسكين
لولاك ما ونيت وأدميت عيناي=يا مسرف بوصلك وهجرك على وين
مراكب الأمال عافت لمرساي=متى بربك ترحم الحال يا زين
إن كان تقدر تنهي الوصل بالباي=أنا علي أهون من الباي سكين
تطعن بها قلبي وتأصل ليا شواي=تنهي بها نبض الغلا بالشرايين
دام الصبر ما عاد ينفع هذا الراي=قالت:عسى ربي على الحال بيعين