أنا وين وأنتي يابعد مهجتي وين=حدتك الظروف وهد صبري انتظاره
تعبت أنتظر ومن التعب نامت العين=وصدري تفوح دلال شوقي بناره
تمنيت أشوفك وأسمعك كامل الزين=قبل لا يصيب القلب جرح انكساره
أنا ما توقعتك بعد ليل تلفين=وغفيت عيوني من سهدها خساره
ألا ليتكِ(ي)قدام ساعة تعرفين=بحالي وكيف الوجد يقدح شراره
طلبتك وأنا محتاج لك ما تردين=وحسيت لي بالروح نكهة مراره
تذكرت كيف الوضع قدام عامين=بوقتٍ(ن)تجيني فيه قبل الإشاره
وذا الحين صار العذر بعدين بعدين=وصلنا على ما قيل عقب السجاره
وأنا أشوف وأنتي بعد مثلي تشوفين=لطفل الغرام اللي غدا شيخ حاره
كبر بيننا بأحضان لهف المجانين=وأخاف الزمان يروعنا بانتحاره
غرامٍ(ن)تربى بين ورد البساتين=شعار الوفا والصدق دائم شعاره
خضع لأمرك وطوعك ومهما تسوين=على العهد باقي ما يغير مساره
يمد لك كف الطيب وأنتي تردين=على الطيب طيب بذوق ناس الحضاره
بعد جيتك لا عاد عنين تروحين=بنيت لك بالخفاق مركز وأماره
مجهز على شأنك بكل ما تمنين=من الخادمة لين الحرس والوزاره
تعالي وعيشي فيه عيشة سلاطين=وحولك جنود الفكر تحرس مداره
ترى ما أتحمل بعد هذي تغيبين=كفا ما مضى والحب هذا قراره
يا ست النساء تسوين عندي ملايين=يا كلك على كلك جمال وشطاره
أنا ما وهبتك خافقي غير تسوين=وصرتي بقلبي مقعدك بالصداره
بعيده قريبه منزلك داخل العين=فداك الفؤاد اللي جعلك اختياره
يناديك نبض الشوق وينك وأنا وين=حدتني ظروف وهد صبري انتظاره