القوافل العربية

يا مريض القلب مالـك عـلاج إلا السمـاح
السماح علاج موصوف لأمـراض القلـوب
والحسد والبغض والله هـي السـم الذحـاح
فتكها في العالم اشـد مـن فتـك الحـروب
لوترى الدنيا غدت نهـب بيديـن الشحـاح
لاتحسف دام الإنسـان لـه رزق محسـوب
الحسايف , يوم تصحى وتلقى العمـر راح
مابقـى إلا مثـل ريـشٍ تقفّتـه الهـبـوب
ماصحيت إلا على الشيب في عارضك لاح
أشرقت شمسه وشمسك على وقت الغـروب
والحسايف , يوم ليلك يطـول بـلا صبـاح
لين تنسى كـل امانيـك واحلامـك تـذوب
ثم يوم النور يطلع علـى الحـزم البـراح
وإن وجهك متجه شـام واحلامـك جنـوب
والحسايف , يوم تتعب على غير الصـلاح
تبذل المجهـود ويضيـع بطـوال الـدروب
وأنت راعي صدق والصدق ماحقق نجـاح
كلما تصدق بحاجـه يفـوز بهـا الكـذوب
في زمانٍ ضيّع الجـد فـي بحـر المـزاح
ماتحصل مـن كثيـر الكـلام إلا الذنـوب
لاتضيّع حكمة الصمـت إذا كثـر الصيـاح
واترك العالم يروحون صوب وروح صوب
وانظر بعين البصيره تـرى الدنيـا كفـاح
ماتشـوف إلا معـارك وغالـب ومغلـوب
كل مافي الأرض من خف وإلا مـن جنـاح
كلهـم شـارد وطـارد وسالـم ومعطـوب
والطيور تطير في الجـو تحملهـا الريـاح
لكن طيور اللحـم تاكـل طيـور الحبـوب
والبشر فيهم هجومـي ولـو مالـه سـلاح
وفيهم اللي ساعة الجد ماهر فـي الهـروب
وفيهم اللي يوم تقفـي يسـدد لـك رمـاح
ويوم تقبل يبتسـم لـك وطيـب ومحبـوب
في زمانك وين تلقى القلوب اللـي صحـاح
والمصالح تحكم الناس راضـي ومغصـوب
عندهـم تـرك العوايـد تقـدم وإنفـتـاح
والصداقه عندهم لبس ثـوب وخلـع ثـوب
لـو بدايتهـا محبـه نهايتـهـا جــراح
وانشد اللي عاش بيـن القبايـل والشعـوب
إختبرت الناس بالسـر ليـن السـر بـاح
وإختبرت وجيه الأصحاب واعطوني الجنوب
كم صديقٍ كان في العين ومن العيـن طـاح
يوم جاء وقت الصداقه وميقـاف الوجـوب
أشهد إن الجود كالطيـب لـو تخفيـه فـاح
واشهد إن البخل عيبٍ مـن كبـار العيـوب
والطمع سارق يضوّي السرايق في المـراح
والفقر نهّاب يدخـل يدينـه فـي الجيـوب
والسعيد اللي قنـع مـن زمانـه وإستـراح
وإنتبـه قـدام تلعـب بـه الدنيـا اللعـوب
لو صبر صبر الجوازي عن العـد القـراح
خيـر مـن دنيـا تغـره وعنهـا مايتـوب

شعر: عبدالله الطلحي