القوافل العربية

القوافل العربية (https://www.alqwafel.com/vb/index.php)
-   قوافل : الحكم والأمثال والألغاز (https://www.alqwafel.com/vb/forumdisplay.php?f=102)
-   -   بعض الامثلة والالغاز (https://www.alqwafel.com/vb/showthread.php?t=2906)

فراشـ المنتدىـــة 20-12-2007 04:42 PM

بعض الامثلة والالغاز
 
السلام عليكم ورحمة الله وبركاته

هي عباره عن الغاز وامثله جداويه اتمن تعجبكم

يالله نبدأ

((بعد ما أكل وأتكا شم ريحة المستكا ))

هذا المثل يضرب للإنسان اللي يأكل الأكل وبشراه بعدين يقول أنا دقت طعم مثلا الهيل وهو ما يحب الهيل في الأكل فيقمو يقوله اللي حوليه هذا المثل .



(( جاء يطل غلب على الكل ))


هذا يضرب للإنسان اللي يكون رايح جلسة للزيارة فقط وبعدين يطول ويا خد الجو كله على الموجودين . فيقوم واحد مقهور ولا ملقوف يقول في نفسه هذا المثل .



(( يا ستي شوفيني من عينك لا تنزلينى ))


هذا المثل اللي يخص البنات وسوالفهم عند الخطابات ههههههههههه

هذا يضرب للي تروح مثلا مع أمها جلسة حريم ولا جمعه أمهات
يعنى مكان فيه ناس كبار فتكون سامعه أن وحده بتخطب لولدها فالبنت يا حرام تقول في نفسها هذا المثل وتسوي ما بدلها عشان بس تلفت نظرها .



((ست وجاريتين على بيضتين ))


هذا يضرب لمن يكون الرجال معصب يبي عشاء
وزوجته وبناته الاثنين بالمطبخ يطبخوله بيضتين



(( البنت بنت أبوها والغرب جوا يخطبوها

ألفين يدفعو مهرها وألفين يراضو في أخوها ))



هذا بيت شعر اقرب من انه مثل وأكيد واضح

>> لو جو يخطبونى كم بيدفعون هههههههه إذا يراضو كل واحد من اخوانى ههههههه


وهذا اللي ينيمو عليها الأطفال


هوها يا هوها

والكعبه بنوها

سيدي سافر مكة

جبلي زنبيل كعكه

فرقتو حبا حبا

ما بقيت إلأحبا

>> اكيد ان لها لحن معين وأكيد انى منى حافظتها تمام



في كمان


نام نام يا فلان واذبح لك جوزين حمام


هذي انا مدري عنها غير انها هي كده جمله ويلحنوها الأمهات

وكل ام وصوتها الحنون



والحيـــــــــــــــــن الألغـــــــــــــــاز


بنت في الطاقة تبكي بكاء االعشاقه ؟


طبعا أنا فحطت في مكاني ولا عرفتها ههههههههههه

وفي الأخير طلعت الجرة ،، لأنهم كانوا زمان يحطونها على الروشان إللي هو طبعا من أهم الأشياء إللي تلاقونها في

بيوت زمان في جدة وهي عبارة عن طاقة من خشب،، فالجره تبرد المويه الي فيها عن طرق التبخر والتكثف


وهذي الصوره توضح الروشان بس اعتذر على عدم وضوحها






بيت أبويا كبير كبير ما يشيلني إلا أنا ؟


هذا الثوب واظنها واضحة


شئ قد الكف يضرب ميئه وألف ؟

هذا المشط ( لمن كانوا زمان البنات يحافظوا على شعورهم وطولها
كان هذا الغز معروف )


بنت في السوق حسها في الصندوق ؟


االتفاريق يعنى الأنصاص والقروش

هذي يمكن واضحة شويه من كلمة الصندوق

وغامضة شوي من كلمة البنت

بس كلمة السوق يمكن توضح أكثر أنا عرفتها على طول



احمر توتو مد عروقو حلف بربه ما يدوقو؟

هذي أنا بتركها لكم لانى والله فحطت وخمسة لين جبتها من جدي الله يرحمه


كل عبد في قفاه قشاية ؟

هذي على الزبيب لان كل حبة زبيبه مغطايه سبحان الله

بقشرة


مشمشه بتدور في صحن بنور ولا يلبسها إلا الود الغندور ؟

هي الساعة
بس مدري هو كان زمان عندهم الفقر كثير يعنى ما يقدرون

يلبسون ساعة ولا ايش ؟


هذا لغز طويل شويه

يوقلك كان في اثنين من الشباب تفرقو وبعد زمن تجمعو
المهم وعرفو بعض فواحد قال:
كيف حال البعيد ؟
صاحبه قال: قرب
قله : طيب كيف حال الجماعه؟
رد عليه : قله اتفرقو
وااخر مره سأله : كيف حال الإثنين ؟
قله صارو ثلاثه


طبعاَ البعدي الي قرب هو النظر
والجماعه الي تفرقو هم الأسنان
والإثنثن الي صارو ثلاثه هم رجلين الرجال والعكاز _ العصا الي يتكي علها _ بس هذي جداويه مره العكاز

واتمن من كل قلبي أنكم تكونو استمتعتو واستفدتو

واعطونى بعض من حاجات زمان اللي عندكم

النجـــــم 21-12-2007 12:00 AM

رد: بعض الامثلة والالغاز
 
الف شكر لك يا فراشة المنتدى

مثل الفراشة من زهرة لزهرة

لك

تقديري

عذبة الصوت 27-12-2007 04:58 PM

رد: بعض الامثلة والالغاز
 
فراشة المنتدى تسلمين ياقلبي منوره القسم بمشاركتج الي ترد الروح


الساعة الآن 12:19 AM

Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir

Ads Management Version 3.0.1 by Saeed Al-Atwi

الحقوق للقوافـل العـربية: جوال الرسائل 966553850455+

a.d - i.s.s.w