يا ذئب وش بك تالي الليل تقنب=من جوع وإلا فاقدٍ(ن)لك مواليـف
ماني بعارف ويش يا ذئب تطلب=وش علتك تعوي بذا الليل وتهيف
يا ذئب صوتك لج بالسمع والهب=في داخلي جمرٍ(ن)مخبيه ما شيف
يكوي عروق القلب والنار تشتب=خلف الضلوع سنين ما صار تخفيف
وأنا بلاي الحب يا ذيب والحب=سقم الذياب إن كان ما جا على الكيف
عدة سنين القلب بالحب متعب=ناد الوليف وسلوته باقي الطيف
ياليتني مثلك على خلي أرقب=وأجر صوتي يمكن يحن ويريف
مير المصيبة دونه جبال وأشعب=الصوت ما ياصله يا حيف يا حيف
دونه صحاري راعي الجهد تذهب=أنا بسيف وصاحبي عني بسيف
صعبٍ(ن)علي أجيه وإن جيته أصعب=خايف عليه من العواذل وتزييف
ناسٍ(ن)تقول لصادق القول تكذب=لولا ظنون الناس حليت له ضيف
بضيافته لو ميً من كفه أشرب=يكفي لروحي قوت من غير تكليف
شوفته ساعة كل عامين مكسب=حالي نباه بحلة الطيب تشريف
نبرة كلامه للمساميع تطرب=اليا سمعته حل بي موسم الصيف
أنسى همومي والهنا صاير أقرب=أصير في حالٍ(ن)يعجز تواصيف
أصير معجب لو ما كنت معجب=في حضرته مني تزين السواليف
لكن حسافة راح يا ذئبٍ(ن)أشهب=ما عاد تنفع في زماني تحاسيف
أقنب وأنا يا ذئب بون وأقنب=ما علتي من جوع فاقد مواليف