علام صويحبي يزعل عليًه يوم غازلته=أنا كنت أحسبه شاعر ويفهم علم دبرنا
عليك الله وأمان الله من اللي فيك قد قلته=مجرد سالفة في شعر بغيابك تذكرنا
زمانٍ(ن)فات ما ينعاد لو ينعاد حصلته=لكني بكتب الأشعار من ماضي مشاعرنا
ليال العمر ماهو كان جوف الراس نزلته=عسى الله يرحم أيام الشقاوية يا مسهرنا
أنا يمكن بلحظة حلم حاجز بيننا شلته=كتبت اللي كتبته وأنت نونٍ(ن)في محاجرنا
يا راع الطيب لا تزعل طريق المزح قفلته=وأقدم لك معاذيري وأريدك بس تعذرنا
بعدها يارفيق الحلم حلم الليل ما طلته=لكن إستر على ما فات وأجبر في خواطرنا
وأنا بوعدك كل اللي كتبته فيك هملته=وحنا يا رفيق الشعر نحشم من يقدرنا
رميت بثوبي اللي من خيال الشعر فصلته=كفاني ما قريته من عتابٍ(ن)في دفاترنا
ترى كل الكلام اللي كتبته فيك حللته=على شان العتاب اللي كتبته في محاضرنا
جميع اللي كتبه بالقصيدة جد تجاهلته=ختمت القاف بالمعذار والله لا يكدرنا
تطمن ماش غير الطيب والطاروق كملته=وحنا مثل ما كنا ترانا ما تغيرنا
ما دام صويحبي زعلان أنا بترك مغازلته=أنا كنت أحسبه شاعر ويفهم علم دبرنا