الى متى وأفعالنا فعل جهال=نركض ورى الأحلام ركض المكينه
ما ندري أن العمر منزل وترحال=والحب من بعده تحل الضغينه
مهما يطول البعد وتطول الأجال=لابد نمسي تحت ذيك الدفينه
مرهونه الأنفس بماضيت الأعمال=في وحدةٍ(ن)مابه خدين وخدينه
الا الذنوب اللي على الكاهل أحمال=محدٍ(ن)يعينك وأنت محدٍ(ن)تعينه
وصار الجسد بعد العجب تحت الارمال=عقب النظارة صار جيفة عفينه
وين المفر لا صرت من تحت الأنثال=هالوا عليك الردم والفرش طينه
وأقفوا وخلوك الأحبه والأنجال=في حفرةٍ(ن)ظلمى كئيبة لعينه
وتقسموا من بعدك عيالك المال=ويمكن بعد ما يخلصوا عنك دينه
وشلون ما نندم على فعل وأقوال=ونبكي على عمرٍ(ن)مضى خابرينه
أيام طيشٍ(ن)حملتنا بالأثقال=حصادها حسره للأنفس مهينه
ذاك المكان اللي يهول بالأهوال=وش فايدتنا كان ما نستبينه
جهنم اللي شربها عصرة خبال=وإن كان ما تبنا غصب شاربينه
ويلاه من ماضي زماني والاغفال=واللي جنيته من مواجع بلينه
أشيلها بالروح مقفا ومقبال=وكلٍ(ن)يشيل الموت داخل وتينه
خلاص بقفل ماضي العمر بقفال=ولا خير في عبدٍ(ن)يفرط بدينه
تبدلت أحوالي اليوم بأحوال=والعلم تفهمه العقول الفطينه
قطعت عن ماضي زماني الإرسال=وفتحت صفحة لليال المبينه
كافي جهل كافي رسائل ومرسال=ما نزرعه بالأخرة حاصدينه