الحمد لله عالم الجهر والغيب=الواحد الرحمن رب الأناما
اللي مرتب كل الأحوال ترتيب=سبحانه اللي ما غشاه المناما
وصلوا على اللي ما نقل عنه تكذيب=قبل التباهي بالفعل والكلاما
النا مواجيب وعلينا مواجيب=عاداتنا ما تختلف يا نشاما
الضيف من حقه بدار المعازيب=يامرحبا عداد وبل الغماما
الله يحييكم على الكيف والطيب=هلا كرامٍ(ن) في حلال الكراما
ماجوبكم منا كثير التراحيب=الله يحيي من يرد السلاما
أقرابنا وأصحابنا والأجانيب=في حفلنا يلقون كل إحتراما
تشريفكم في حفل عادل بلا ريب=على الصدور وسام وأغلى وساما
لبيتوا الدعوة معزة وتوجيب=وحنا لواجبكم نرحب قياما
تصفى لجيتكم جميع المشاريب=بحضوركم يكمل فرحنا تماما
تشريفكم كمول ما يلحقه عيب=شرف لنا سنة نبي السلاما
ومطلوبنا لن كان فيها مطاليب=المعذرة والعذر ماهو حراما
نخشى نقصر في حقوق الأشانيب=من دون قصد بحق شيخ وغلاما
ما كامل إلا عالم الجهر والغيب=الواحد الرحمن رب الأناما