خطر على بالي مع الليل هوجاس=وأنا هجوسي بالليالي خطيره
سرى بي الهاجس بعد نامو الناس=وأنا بمصر وهاجسي بالجزيره
ياليل رمش العين ساهر ولا هاس=أفكار ليلي دايرة مسـتديره
ذكرت سيد البيض دعاج الأنعاس=اللي وهبته خافقي والسريره
عذب السجايا غرو خرعوب مياس=طيفه معي في كل دارٍ(ن)وديره
حلو المشاعر عطر زفرات الأنفاس=أرق من ملمس خيوط الحريره
ألذ من عذبٍ(ن)تملت به الكأس=رشيقةٍ(ن)مثل المهاة الصغيره
أبرد من النسناس لن هب نسناس=وأحر من شمسٍ(ن)بوقت الظهيره
أغلى من الألماس وأصفى من الماس=في عين مغليها غلاتي كبيره
درة حياتي تاج يزهى به الرأس=وأنا وطن تحمي حماه الأميره
بسمة هناي أجمل جميلات الأوناس=من غيرها دنياي حبة شعيره
لن غبت عنها كن بالقلب قباس=يحرق عروق القلب بالزمهريره
أغدي مثل بنٍ(ن)تولاها حماس=يبي يسوقه كيف حق العشيره
كني كما اللي صايبه شر وسواس=اهرج لنفسي ونفسي كسيره
وإن كنت عنده كل ما فيَ من بأس=ينزاح وأشعر بالهنا والسريره
أضحك معه في كل قومة ومجلاس=أحلى الليالي ليل خلي سميره
نوره يضوي ليل لو كان غطلاس=وأخذ من أنفاس الغرام تعطيره
تنعش عروق القلب ويهيج الإحساس=مالي سواها بالوناسة خشيره
خطر على بالي مع الليل هوجاس=وأنا هجوسي بالليالي خطيره