كنت قبلك بخير ولا عليّه خلاف=لين غيرت فيني نظرتي للحياه
خافقي من عرفتك صار فيه ارتجاف=وأنت من سبب الرجفه وزود بلاه
كل ما جئت بهجع لذة النوم عاف=أقضي الليل كله متعبٍ(ن)للتكاه
السهر سم حالي والليالي عجاف=ما تحقق لقلبي كل ما هو بغاه
لافه الحب والخافق لباقي لاف=لين عودي شديد الشوق هد لقواه
كن فكري لطيفك ياحبيبي مطاف=يذكرك بالصيام ويذكرك بالصلاه
الأماني تزفك للمشاعر زفاف=والوقائع تبدل فرحة الحلم بآه
لا تذكرت ثقل ظروف ماهي خفاف=حايله بيننا ونيت ونة حفاه
ونةٍ(ن)جايرة ترجف خلاف النحاف=صوتها في قصيدي بان راجع صداه
العمر راح كله ما يعود خلاف=كيف يرجع زمانٍ(ن)ضاع مني حلاه
كنت قبلك بخير ولا عليّه خلاف=لين غيرت فيني نظرتي للحياه